Faire le puet cortoisement
Et cascuns par soi simplement.
Qant à cheval furent tout troi
Cortoisement et sans desroi,
Le Gué passent le prémerain ;
Qant outre furent li ciertain
Ne l’araisone ne tant ne qant,
Mais de jouster li font sanblant.
Li uns d’iaus fu cois et riestis,
Li autres est es armes mis.
Courtoisement l’atent et biel
Por avoir joste del’ Dansiel ;
Qant cil les voit de tel mesure
Isne-le-pas se raséure.
Et entre-tant s’est porpensés
Por cho vient-il gaitier au Gués
Por pris et por honor conquerre.
Le vassal est alés requerre,
Lance baissé a l’escu pris,
El gravier est contre lui mis.
Andui por joindre ensanble meurent
Es lances andui se rechéurent,
Si que de lances font astieles,
Mais ne widièrent pas les sieles.
Tant furent fort li Chevalier
Aquastroné sont li destrier,
Et cascuns a mis pié à tiere
Ot les bons brans se vont requerre ;