Dementiers que li plais dura,
Graelent pas ne s’ublia ;
Sun blanc cheval fist amener,
Od s’Amie s’en veut aler.
Quant ele ot fait çou qu’ele quist,
E ot oï que li Cors dist,
Cungié demande et prent del’ Roi,
E munte sor sun palefroi :
De la sale se départi,
Ses Puceles ensanble od li.
Graelent munte et vait après
Parmi la vile à grant eslès[1] ;
Tuz-jurs li va merci criant,
Ele ne respunt ne tant ne quant.
Tant unt lor droit chemin tenu,
Qu’il sunt à la forest venu ;
Parmi le bos lor voie tinrent,
Desi qu’à le rivière vinrent,
Ki en une lande sorteit,
E parmi la forest coureit.
Mut en ert l’iave blanche et bele,
Dedens se met la Dameisele :
Graelent i veut après aler,
Mais ele li cumence à crier :
Fui, Graelent, n’i entre pas,
Se tu t’i mès, tu noieras.
- ↑ A grant eslès, au grand galop, rapidement.
