Au Rei dient qu’il atendist
Tant que lor Dameisele venist.
Mut furent celes esgardées,
E lor biauté de tuz loées :
De plus beles en i aveit
Que la Roïne n’en esteit.
E qant lor Dameisele vint,
Tote la Curt à li se tint :
Mut ert bele de grant manière,
A dox sanblant, od simple cière,
Biax ex, biax vis, bele façun,
En li n’a nient de mesproisun.
Tot l’esgardèrent à merveille,
D’une porpre tute vermeille
A or brosdée estreitement,
Esteit vestue richement ;
Ses mantiax valeit un castel.
Un palefroi ot buin et bel :
Ses frains, sa sele è ses lorains,
Valoit mil livres de çartains.
Pur la véoir issent tut hors,
Sun vis loerent è sun cors,
E sun sanlant è sa faiture.
Ele ne vait grant aléure :
Devant le Roi vint à cheval,
Nus ne li puet turner à mal ;
A pié descent emmi la place,
Sun palefrei pas n’i atace.