Li Reis respunt : Dans Graelent,
Trop parlastes vilainement ;
Vers la Roïne mespréistes,
E tus mes Baruns desdéistes :
Jamès d’autre ne mesdirés,
Qant de mes mains départirés.
Li Reis parole hautement,
Segnur, dist-il, del’ jugement
Vus pri que ne le déportés
Selunc le dit q’oï avés,
Ke Graelent oïant vus dist,
E en ma Curt hunte me fist :
Ne m’aime pas de boine amur,
Qui ma Femme dist deshonur.
Ki volentiers fiert vostre chien[1],
Jà mar querés qu’il vus aint bien.
Cil de la Curt sunt fors alé,
Al jugement sunt asanblé :
Une grande pièce sunt tut coi,
Qui n’i ot noise ni effroi
Mult lur poise del’ Chevalier,
S’il le vaulent par mal jugier.
Ains que nus dex mot i parlast,
Ne le parole racuntast,
Vint un Vallès qui lor a dit
Qu’il atendissent un petit.
- ↑ Ancien proverbe.
