Page:Marie de France - Poésies, éd. Roquefort, I, 1820.djvu/528

512

LAI DE GRAELENT

Cest destrier par mei vus enveie,
Ensanble od vos veut que jeo seie :
Vos gages vus aquiterai,
De vostre hostel garde prendrai.350
Qant Graelent ot la novele,
Qui mult li sanble boine è bele ;
Le Vallet baise boinement,
E puis ad reçut le présent,
Le destrier sos ciel n’a si bel,
Ne mius corant, ne plus isnel ;
En l’estable pur sei le met,
E le cacéor au Varlet.
Cil a sa male destorsée,
En la canbre l’en a portée,360
Puis l’a uverte è deffremée
Une grant coute en a getée^[1] :
D’un riche paile ovrée fu^[2]
D’autre part d’un riche boufu^[3],
Met le sor le lit Graelent ;
Après met sus or è argent,
Buins dras à sun Segnur vestir^[4],
Après fait sun oste venir,

1. Coute, couverture, coussin, lit de plume, de culcita.
2. Paille, étoffe quelconque ; tenture, tapisserie. On disoit
   paile ou paille de soie, pour taffetas, satin ; paile de penne,
   fourrure, etc.
3. Boufu, garniture, frange, ornement.
4. Draps, habits, vêtements, hardes en général.