Tute la nuit veillat issi
Ne reposa ne ne dormi ;
Al demain est matin levée,
Sun Chamberlenc ad apelé,
Tut sun estre li ad mustré,
A une fenestre est alé.
Par fei, fet-ele, mal m’esteit,
Jo sui chéïe en mal espleit :
Jeo eim le novel Soudéer
Eliduc li bon Chevaler.
Unques à nuit n’en ai repos,
Ne por dormir les oilz ne clos.
Si par amur me veut amer,
E de sun cors asséurer,
Jeo ferai trestut sun pleisir,
S’il en peot grant bien avenir.
De ceste tere serat Reis
Tant par est sages è curteis ;
Que s’il ne m’aime par amur,
Murir m’estuet à grant dolur.
Quant ele ot dit ceo ke li plot,
Li Chamberlenc qu’ele apelot
Li ad duné cunseil léal,
Ne li deit-hum turner à mal.
Dame, fet-il, quant vus l’amez
Envéez-i, si li mandez
Ceinture, u las, u anel,
Envéiez-li, si li est bel.
Page:Marie de France - Poésies, éd. Roquefort, I, 1820.djvu/440
Cette page a été validée par deux contributeurs.
424
LAI D’ELIDUC.
