Forment le prie en sun curage
Amurs i lance sun message
Qui la somunt de lui aimer,
Palir la fist, è suspirer.
Mès nel’ volt mettre à reisun,
Qu’il ne li tint à mesprisun.
Une grant pièce i demura,
Puis prist cungé, si s’en ala ;
El li duna mut à enviz,
Mès ne purquant s’en est partiz.
A sun ostel s’en est alez,
Tut est murnes è trespensez,
Pur la bele est en effrei,
La fille sun Seignur le Rei
Qui tant ducement l’apela,
E de ceo qu’ele supira.
Mut par se tient à entrepris
Que tant ad esté al païs
Que nel’ ad pas véue soyent
Quant ceo od dit si se reprent ;
De sa femme li remembra,
E cum il li asséura
Que bone fei li portereit,
E léaument se cuntendreit,
La Pucele k’il ot véu
Vodra de li fère sun dru,
Unques mès tant nul ne prisa
Si ele peot s’il retendra.
Page:Marie de France - Poésies, éd. Roquefort, I, 1820.djvu/438
Cette page a été validée par deux contributeurs.
422
LAI D’ELIDUC.
