Mut l’aveit volenters servi,
Mes li Rei pas ne respundi :
Quant il nel’ volt de rien oïr
Si l’en covient-il dunc partir.
A sa meisun en est alez,
Si ad tuz ses amis mandez,
Del’ Rei sun Seignur lur mustra,
De l’ire que vers li leva.
Mut li servi à sun poeir,
Jà ne déust maugré aveir ;
Li vileins dit par repruvier
Quant tence à sun charier,
Qu’amur de Seignur n’est pas fieuz,
S’il est sages è vedzieuz.
Ki leauté tient à sun Seignur,
Envers ses bons veisins amur :
Ne volt al païs arester,
Ainz passera ceo dit la mer.
Al Réaume de Loengre ira,
E une pièce se déduira ;
Sa Femme en la tere l’arra,
A ses hummes cumandera,
Qu’il la gardoet léaument,
E tuit si ami ensement.
A cel cunseil s’est arestez,
Si s’est richement aturnez ;
Mut furent dolent si ami,
Pur ceo que d’eus se départi.
Page:Marie de France - Poésies, éd. Roquefort, I, 1820.djvu/420
Cette page a été validée par deux contributeurs.
404
LAI D’ELIDUC.
