Voleit chescun estre primers
De bien fère, si il péust,
Pur ceo que à la Dame pleust :
Tuz la teneïent pur amie,
Tuz portouent sa druerie,
Anel, u mance, u gumfanun,
E chescun escriot sun nun.
Tuz quatre les ama è tient
Tant qu’après une Paske vient,
Que devant Nantes la cité
Ot un turnéïement crié,
Par aquointer les Quatre Druz,
I sunt d’autre païs venuz :
E li Franceis, è li Norman,
E li Flemens, è li Breban,
Li Buluinez, li Angevin ;
Cil ki près furent véïsin
Tuz i sunt volenters alé
Lunc-tens aveïent sujurné,
Al vespres del’ turnéïment,
S’entreférirent durement :
Li Quatre Druz furent armé,
E eissèrent de la cité.
Lur Chevaliers viendrent après
Mès sur eus Quatre fu le fez.
Cil defors les unt conéuz,
As enseignes, è as escuz,
Cuntre envéïent Chevaliers
Page:Marie de France - Poésies, éd. Roquefort, I, 1820.djvu/390
Cette page a été validée par deux contributeurs.
374
LAI DU CHAITIVEL.
