Ki en la chambre osast entrer,
Ne devant lui cierge alumer.
Mut ert la Dame en grant tristurs,
A lermes, à suspirs, à plurs :
Sa biauté pert en tel mesure,
Ce est ele qui n’en prent cure,
De soi méismes melz vousist,
Que au jurs hastiue la preist :
Ce fu el mois d’avril entrant,
Quant cil oisel lievent lur chant ;
Li Sires fu matin levez,
D’aler en bois s’est aprestez :
La Vieille a fait lever sus,
Et après lui fermer les us.
Cele a sun coumandement fet,
En une autre chambre s’en vet ;
En sa main porteit un sautier,
Où ele voleit verseillier.
La Dame plore en esveil,
Choisi la clarté du souleil :
De la Vielle est apercéue,
Qui de la chambre esteit issue ;
Mult se plaigneit è suspireit.
Et en plurant se démenteit.
Lasse, fet-ele, mar fui née,
Mout est dure ma destinée,
En ceste tor suis en prisun,
Jà n’en istrai se morte nun.
Page:Marie de France - Poésies, éd. Roquefort, I, 1820.djvu/292
Cette page a été validée par deux contributeurs.
276
LAI D’YWENEC.
