N’i ot celi mix ne vausist
Que la Roïne ne fésist.
La maistre fu cortoise et sage
Avenament dist sun mesage.
Rois, car nus fais canbres baillier,
Aveuc nos Dames herbregier,[1]
Ele vient ci à tei parler,
Il les coumanda à mener,
Od les autres qui ançois vindrent,
Unques depuis nul plait ne tindrent.
Quant il fu delès délivrez,
Puis a tus ses Baruns mandez,
Si lur a dit que seit rendus,
Li jugemens trop est tenus :
La Roïne se cureçeit
De çou que trop i demereit.
Jà le départissent aitant,
Qant par la vile vint pognant,
Tost à ceval une Pucele,
En tut le munde n’ot si bele.
Un blanc palefroi cevauçoit
Qui bien è souef le porteit :
Moult ot bien fait è col è teste,
Sos ciés n’out plus gente beste ;
Rice ator ot el palefroi,
Sous ciel n’en ot si rice Roi,
Qui tot le péust acuitier,
Sans tere vendre u engagier.
- ↑ Nos Dames pour notre maîtresse.
