Valletz avez bien afaitiez,
Ensanble od eus vus déduisiez ;
Vilains couars mauvais faillis,
Mut est me Sire mal-baillis,
Ki entur lui vus a suffert
Mien ensient que dui en pert.
Quant il l’oï mut fu dolens
De respundre ne fu pas lens ;
Tel cose dist par mal-talent
Dunt il se repenti suvent.
Dame, dist-il, de tel mestier
Je n’en rien sai nient aidier,
Mais je aim è se suis amis,
Celi qui deit aveir le pris,
Sur tutes celes que je sai ;
E une cose vus dirai,
Bien le saciez en descuvert,
Une de celes qui la sert,
Tute la plus povre mescine ;
Vaut mix de vus, Dame Roïne,
De cors, de vis, è de biauté,
D’ensegnement, è de bunté.
La Roïne s’en part à-tant,
En sa canbre s’en va plurant ;
Mut fu dolente et curécie
De ce que si l’eut avillie.
En sun lit malade cucha
Jamès, ceo dist, n’en lévera
Page:Marie de France - Poésies, éd. Roquefort, I, 1820.djvu/240
Cette page a été validée par deux contributeurs.
224
LAI DE LANVAL.
