Ensanble od eus esteit Gauvains,
Et ses cousins li biaus Ivains.
Ce dist Gauvains li biaus, li prus,
Ki se faiseit amer à tus ;
Por Diu, Segnur, ne feisum mal
De nustre cumpagnun Lanval,
Ki tant est larges è curteis,
E ses pères est si rices Reis,
Ke nus ne lavuns amené.
A-tant se sunt aceminé,
A sun ostel revunt arière,
Lanval ameinent par proière.
A une fenestre entaillée,
S’estoit la Roïne apoiée ;
Trois Dames ot ensanble od li,
Li une d’eles ad coisi.
Lanval cunut et esgarda,
Une des Dames apela ;
Tantost manda ses Dameiseles,
Les plus cointes è les plus beles,
Od li s’iront esbanoier
Là ù cil èrent ù vergier,
Trente en mena od li è plus,
Par les degrés descendent jus.
Li Chevalier encuntre vunt
Qui pur eles grant joie funt ;
Il les unt prises par les mains,
Cil parle nient n’est pas vilains.
Page:Marie de France - Poésies, éd. Roquefort, I, 1820.djvu/236
Cette page a été validée par deux contributeurs.
220
LAI DE LANVAL.
![](http://upload.wikimedia.org/wikipedia/commons/thumb/7/7c/Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu/page236-1024px-Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu.jpg)