Cum plus despendra largement,
E plus ara or et argent.
Amis, dist-el, or vus casti[1]
Si vus cumande è si vus pri,
Ne vus descuvrez à nul hume,
De ce vus diroi-jeo la sume.
A tus-jurs m’ariez perdue,
Se ceste amurs esteit séue ;
Mès ne me purriez véoir,
Ne de mun cors sésine avoir.
Il li respunt que bien tenra
Tut çou qu’on li cummandera.
Dalès li est ù lit couciés,
Or est Lanvax bien herbegiés ;
Ensanble od li la relevée,
Demura dusqu’à la vesprée,
E plus i fust se il poïst,
E s’Amie li consentist.
Amis, dist-ele, levez sus,
Vus ne poez demurer plus ;
Alez vus-ent jeo remeindrai.
Mais une cose vus dirai,
Quant vus vourez à mei parler,
Jà ne sarez cellui penser,
U nus hum puist truver s’Amie,
Sans repruce et sans vilonie,
Ke je ne vus seie en présent
A faire vos cumandement ;
- ↑ Le verbe Castier signifioit recommander, inviter, donner avis, conseiller, instruire, et non corriger, châtier.