Le Reis demande la despoille :
U bel li seit u pas nel’ voille ;
Arière la fet aporter,
Al Bisclaveret la fist doner.
Quant les urent devant li mise
Ne se prist garde en nule guise ;
Li Prudum le Rei apela,
Cil ki primes le cunseilla :
Sires, ne fètes mie bien
Cist nel’ fereit pur nule rien,
Que devant vus ses dras reveste,
Ne muet semblance de beste.
Ne savez mie que ceo munte
Mut durement en ad grant hunte :
En tes chambres le fai mener,
E la despoille od li porter ;
Une grant pièce l’i laisrums,
S’il devient hum bien le verums.
Li Reis méïsmes le mena,
E tus les hus sur li ferma ;
Al chief de pièce i est alez,
Deus Baruns ad od li menez,
En la chambre entrent tut trei
Sur le demeine lit al Rei
Trova dormant le Chevalier.
Li Reis le curut enbracier,
Plus de cent feiz l’acole è baise,
Si tost cum il pot aver aise.
Page:Marie de France - Poésies, éd. Roquefort, I, 1820.djvu/214
Cette page a été validée par deux contributeurs.
198
LAI DU BISCLAVERET.
