Issi remist un an entier,
Tant que li Reis ala chacier :
A la forest ala tut dreit,
La ù li Bisclaveret esteit.
Quant li chiens furent descuplé,
Li Bisclaveret unt encuntré ;
A lui currurent tute jur,
E li chiens è li venéur
Tant que par poi nel’ eurent pris,
E tut déciré è mau-mis.
Desi qu’il ad le Rei choisi ;
Vers li curut querre merci.
Il l’aveit pris par l’estrié,
La jambe li baise è le pié.
Li Reis le vit grant poür ad ;
Ses cumpainuns tuz apelad.
Seignurs, fet-il, avant venez,
Ceste merveille esgardez ;
Cum ceste beste se humilie :
Ele ad sen de hum, merci crie
Chacez mei tuz ces chiens arère,
Si gardez que hum ne la fière.
Ceste beste ad entente è sen,
Espleitez vos ; alum nus en.
A la beste durrai ma pès
Kar ici ne chacerrai huimès.
Li Reis s’en est turné à-tant.
Le Bisclaveret li vet siwant ;
Page:Marie de France - Poésies, éd. Roquefort, I, 1820.djvu/204
Cette page a été validée par deux contributeurs.
188
LAI DU BISCLAVERET.
