Quant ele sot ke il la prist,
Unques péjur semblant ne fist.
Sun seignur sert mut bonement
E honure tute sa gent.
Li Chevalier de la meisun,
E li vadlet, è li garçun,
Mervéïllus dol en meneient
De ceo ke perdre la deveient.
Al jur des noces qu’il unt pris,
Sis Sires i mande ses amis,
E l’Erceveske i esteit,
Cil de Dol qui de lui teneit,
S’Espuse li unt amenée,
E sa mère est od li alée.
De la Meschine aveit pour
Vers ki sis Sirs ot tel amour
Que à sa fille mal tenist,
Vers sun Seignur si ele poïst,
De sa meisun la getera ;
A sun Gendre cunseilera
Que à un Preudum la marit
Si s’en déliverat, ceo quit.
Les noces tiendrent richement,
Mut i out esbaniement,
La Dameisele ès chambres fu ;
Unques de quanke ele ad véu,
Ne fist semblant que li pesast,
Page:Marie de France - Poésies, éd. Roquefort, I, 1820.djvu/180
Cette page a été validée par deux contributeurs.
164
LAI DEL FREISNE.
