Quant l’Abbesse eist del’ Eglise,
Li Portiers vet à li parler,
L’aventure li vait cunter,
Del’ Enfant cum il le trovat.
L’Abbéesse le comaundat
Que devaunt li seit aporté
Fut issi cum il fut trové.
A sa meisun vet li Portiers
L’Enfant aporte volentiers ;
Si l’ad à la Dame mustré ;
Cele l’ad forment esgardé,
E dit que nurir le fera
E por sa nièce le tendra.
Al Portier ad bien défendu
Qu’il ne die cument il fu.
Ele méismes l’ad levée.
Pur ceo qu’al Freisne fut trovée,
La Freisne li mistrent al nun,
E le Freisne l’apelet hum.
La Dame la tient pur sa nièce,
Issi fut celée grant pièce ;
Dedenz le clos de l’abbéie
Fu la Dameisele nurie.
Quant ele vient en tel éé
Que Nature furme beauté,
En Bretaine ne fu si bele,
Ne tant curteise Dameisele.
Franche esteit è de bone escole,
Page:Marie de France - Poésies, éd. Roquefort, I, 1820.djvu/170
Cette page a été validée par deux contributeurs.
154
LAI DEL FREISNE.