Un gros anel li lie al braz,
De fin or i aveit un unce ;
En chescun turn out un jagunce.
La verge entra ; esteit lettrée
Là ù la Meschine est trouvée,
Bien sachent tuit vereïement
Qu’ele est née de bone gent.
La Dameisele prit l’Enfant,
De la chambre s’en ist à-tant ;
La nuit quant tut fut aseri,
Fors de la vile s’en eissi,
En un grand chemin est entré
Ki en la forest l’ad mené.
Parmi la forest sa veie tint,
Od tut l’Enfant utre en vint,
Unques del’ grand chemin n’eissi.
Bien loinz sur destre aveit oï
Chiens abaier, è coks chanter,
Iloc purrat vile trover.
Cele part vet à grant espleit
E la noise des chiens oïeit ;
En une vile riche è bele,
Est entrée la Dameisele ;
En la vile out une abéie,
Durement riche è garnie.
Mun escient Noneins i ot,
E Abéesse kis guardot.
La Meschine vist le mustier,
Page:Marie de France - Poésies, éd. Roquefort, I, 1820.djvu/164
Cette page a été validée par deux contributeurs.
148
LAI DEL FREISNE.
