Cette page a été validée par deux contributeurs.
Car ſeure ſuis qu’a vng ſecond ne tiers
Ne monſtrerez ma faulte voluntiers.
Fors a celuy qui ſur tous a pouoir,
Enuers lequel vous ferez tout deuoir
De mexcuſer, ien ſuis bien aſſeuree.
Car ceſte amour en noz cueurs emmuree
Soit de monſtrer ce liure ou le cacher
Fera ſi bien quon ne pourra toucher
À mon honneur quentre voz mains ie mectz,
Comme à la dame en qui ie vous promectz
Jay mis cueur, corps, amour, entendement
Où ne verrez iamais nul changement.
Parlant de moy, oublier ie ne doy
Celles de qui la douleur, ie le croy,
Merite bien que vous vueillez entendre
Leurs paſſions car elles veullent tendre
A qui aura de bien aymer lhonneur
Et dauoir plus dans le cueur de douleur.
