Cette page a été validée par deux contributeurs.
Qui a le cueur de douleur plus tenté.
¶ Son œil deffaict toute faintiſe et ruze
Son ſens entend la fin de tous propous,
Et ſon cueur ſent mieulx qu’en touchant le poulx
Qui ayme ou non, Brief, nully ne labuſe.
¶ Si nous perdons de luy le iugement
Et de ſa ſeur, qui de luy doit tenir
Et ſes propos vertueux retenir,
Vng autre iay en mon entendement.
Ceſt ceſte la qui na gloire petite
De noſtre temps, mais la plus eſtimee
Eſt, et la plus parfaictement aymee,
Ce que treſbien par ſes vertuz merite.
¶ Si par beaulte ſe congnoiſſent les femmes,
Allez ou ſont dames et damoyſelles,
Comme vng ſoleil au mylieu des eſtoilles
Vous la verrez parmy toutes les dames.
¶ Si par vertu ſon nom ſe doit congnoiſtre,
