Cette page a été validée par deux contributeurs.
Oſtre debat ce me diſt la premiere
Mect noſtre eſprit en tell’obſcurite
Quil ne nous fault pas petite lumiere.
Ie nen ſcay qu’un qui a la verite
Puiſſe iuger qui plus a de doleur
Et plus dhonneur par ſouffrir meritè.
¶ C’eſt celuy ſeul duquel la grant valeur
Na ſon pareil, et a tous eſt exemple
Des grans vertuz, par qui saquiert honneur.
Ceſt luy qui peult triumpher en ſon temple
Ayant paſſè par celuy de vertu.
Ceſt luy que ciel, et terre, et mer contemple.
¶ La terre a ioye le voyant reueſtu
Dune beaulte, qui na point de ſemblable
Au prix duquel tous beaulx ſont vng feſtu.
La mer deuant ſon pouoir redoubtable
Doulce ſe rend, congnoiſſant ſa bontè
Et eſt pour luy contre tous fauorable.
