Cette page a été validée par deux contributeurs.
Las mon ennuy eſt pour long temps durer
Car le ſuſpens de la concluſion
Quil faict daymer, me contrainct dendurer.
Son doulx parler meſt vne illuſion
Qui maueugliſt ſens et entendement
Et de laymer me donne occaſion.
¶ Helas ſes faictz parlent bien autrement,
Par eulx ie voy que de luy ſuis laiſſee.
Il dit que non, Verite dit quil ment.
Par ſes effectz ma ioye eſt rabaiſſee,
Par ſon parler elle ſe reſſuſcite,
Ainſi des deux ſans ceſſer ſuis preſſee.
¶ Si grand douleur grande pitie incite
Plus que de vous, Ayez compaſſion
De mon malheur, qui a la mort me cite.
Celle qui na riens qu’vne paſſion
Dont la cauſe eſt congneue et bien certaine
O quel’eſt pres de conſolation.
