Cette page a été validée par deux contributeurs.
Moy qui ſcauoys ſa grande affection
Et deuant qui faillir a ſa maiſtreſſe
Euſt crainct, de peur de ma correction.
Seroys ie bien ſi meſchante et traiſtreſſe
Le receuoir ? voyant quil faict mourir
Par ſon peche ma compaigne en triſteſſe ?
¶ Iaymeroye mieulx par mort me veoir perir
Qu’en la voyant porter ſi grant torment
Ie feiſſe riens pour ceſte amour nourrir.
En ſa faueur ie laiſſe entierement
Veoir, et parler, ou ſe puiſſe atacher
Lœil, et le cueur, d’un ſi meſchant amant.
¶ Ie laimoye tant, et le tenoye ſi cher
Quant il laymoit, comme sil m’euſt aymee,
Mais maintenant ne le veulx approcher.
Samye eſtoit digne deſtre eſtimee
Il deuoit bien pour iamais si tenir,
Et elle auſſi daymer neſtoit blaſmee.
