Cette page a été validée par deux contributeurs.
¶ Et qu’un qui fuſt moindre que toy iaymaſſe
Plus toſt mourroys que de my conſentir,
Point ne mectray mon amytié ſi baſſe.
Ie ne me puis et me veulx repentir
De ceſte amour, fermetè la tient forte,
Mais la douleur la veult aneantir.
¶ Fut il iamais malheur de telle ſorte ?
Iayme vng amy qui dit m’aymer, mais quoy ?
Ie voy et ſcay qu’amour eſt en luy morte.
Laiſſer le doy, car clerement ie voy
Quil eſt menteur. Mais mon amour honneſte
Ne me permect faire ce que ie doy.
¶ Et tant que d’œil, bouche, pied, main, ou teſte,
Signe damour verray, rompre ne veulx
Ceſte amytie priſe a ſa grant requeſte.
Si fermes ſont les lyens et les nœudz
Que ſi rompuz ilz ſont de ſon couſtè
Ilz ſont du mien encor entiers et neufz.
