& boys & les trois Dames parlantes à la Royne de Navarre, leurs touretz de naiz baissez au dessoubz du menton, la Royne faisant contenance de les vouloir mener & pourmener dans le dict pré. »
4. « Icy est la quarte hystoire, où sont la Royne de Navarre & les dides trois Dames qui se pourmènent ensemble par le pré ; l’une desquelles Dames parle à la Royne, luy monstrant une de ses compaignes. Et toutes trois ont leurs mouchouers chascune en sa main, & les deux qui ne parlent font contenance de fort plourer. »
5. « Icy est la quinte histoire où est une des troys Dames levant les yeulx en hault comme pasmée & couchée par terre. Et une de ses compaignes la soustient per derrière en son gyron. Et la Royne de Navarre luy couppe son lacet. L’aultre des Dames prend la Royne par la main & de l’aultre main faict signe qu’elle veult parler à elle, & apparest le ciel & le soleil en couleur telle qu’il est une heure avant son coucher. »
6. « Cy endroict la sixiesme histoire, pareille à la quinte fors que la première des troys Dames, estant couchée & pasmée, a sa teste appuyée au giron de la Royne de Navarre. La seconde des Dames est tombée d’aultre costé comme esvanoye & la tierce est levée à genoulx, faisant signe de la main comme parlante d’audace, & est tournée vers la Royne. »
« Soit noté que, avec les hystoires précédentes & ceste cy, est ung arbre au coing du dict pré, soubz lequel arbre sont couchées & esvanouyes les dictes trois Dames. »
7. « Cy endroict est la septiesme hystoire semblable aux deux précédentes, sinon que l’une des troys Dames est couchée ou pré, acoultée sur le coulte. L’aultre, qui estoit à genoulx près de l’arbre, est en son séant, appuyée contre le dict arbre, toute pasle & transsye, & la Royne de Navarre luy frotte une main entre les siennes pour la faire revenir, & l’aultre Dame, qui estoit couchée ou giron, parlant & faisant signe de la main comme si elle parloit à celle qui est appuyée au dict arbre. »
8. « Icy est la huictiesme histoire, qui est pareil lieu que les précédentes ; mais la Royne de Navarre & les troys Dames sont levées sur pied près le dict arbre, & la Royne leur monstre le soleil se couchant & la nuict prochaine. Et toutes les troys Dames font signe de leurs mains comme estans en grande querelle. »
9. « Icy est la neufviesme hystoire, où est une grande pluye d’obscurité, & les troys Dames plorantes saillent hors du dict pré dens ung chemin ou quel est une coche tirée à quattre jumentz noyres, attellées deux à deux, en la quelle coche est desjà entrée la Royne de Navarre. L’une des dames est en l’eschelle pour y monter ; l’autre passe la haye du pré, & la tierce est encores dedens le dict pré, toutes troys plorantes, leurs mouchouers ès mains. Et ap-
