escripts traictants de telle divination ont esté reçeus de nos prédécesseurs & mis entre nos mains.
Le Philosophe vouldra que je tienne les divinations des songes n’estre vaines & inutiles pource que l’issue & l’effect approuvent la discipline qui traicte de telles choses, &, pour mieuls m’induire à le croire, mettra en avant l’exemple des deux Arcades, dont l’un, qui estoit allé loger à l’hostelerie, apparut en dormant à celuy qui estoit en maison bourgeoise, le priant de ne laisser sa mort impunie & qu’il avoit esté tué par son hoste, getté dans un tumbereau & couvert de fumier, ce que l’aultre trouva le matin estre vray.
Si cela est croyable, pourquoy ne croiray je aussi que le feu Roy François a peu adnoncer à sa Sœur Marguerite en son dormant qu’il estoit trespassé ? Nous lisons qu’une femme de Sparte, nommée Rutilie, après que plusieurs mois elle eut attendu son mary, qui estoit allé à la guerre, sans en avoir nouvelles, un jour qu’elle retourna du marché à sa maison, trouva une petite chienne, qu’elle aimeoit fort, triste & gémissante, dont elle divina la mort de son mary, qu’elle sçeut le lendemain. Si tu veuls que je le croye, qui m’engardera de croire aussi que ceste Religieuse folle a peu par ses pleurs signifier à Marguerite la mort du Roy son frère ? Socrate en Platon, estant prisonnier, veit en dormant une très belle femme qui, l’ayant appelle par son nom, lui dist ce vers d’Homère :
Dedans trois jours te trouveras en Pthie.
Le lendemain, il dist à son amy Criton qu’il luy convenoit mourir dans trois jours, & ainsi luy arriva qu’il avoit prédit. Si le Platonique s’efforce de me contraindre à
