diteur, a esté noté d’estre mol & efféminé. La gravité de Caton inciteoit un chascun à le révérer, mais la coustume qu’il havoit de boire & de banqueter aulcunefois toute la nuict a diminué je ne sçay quoy de sa grandeur. Et à Cicéron, qui fut appelle des Romains Père de Patrie & qui remit Rome en sa liberté & franchise, fut reproché qu’il s’asseoioit sur deux selles, en quoy son inconstance fut notée.
Que si nous mettons en avant tous les Empereurs, Princes, Philosophes & les illustres personnes, tant hommes que femmes, certes tu n’en trouveras un seul qui ayt esté entièrement perfaict. Solomon estoit remply de la sagesse Divine, & le Seigneur mesmes appelle David son serviteur, & toutefois le trop grand amour des femmes induisit l’un à idololatrie, l’aultre à adultère & homicide. Et l’Apostre S. Pierre, combien qu’il heust l’esprit de Dieu & deust havoir la principauté & prélature en l’Église Chrestienne, fut toutefois trouvé repréhensible.
Somme, qui est celuy qui ait oncques esté tant insigne en piété, en foy, en sanctité & en toutes les vertus, qui n’ayt failly en quelque chose ? S’il n’estoit ainsi, pour néant diroit l’Escripture que sommes tous subgets a vanité, tous avons failly du droict chemin, & n’en est un seul qui de sa nature face aulcun bien. Que si nous estions du tout sans vice & péché, pour quoy nous commanderoit Jésus prier que nos offenses nous soient remises & pardonnées ainsi que nous pardonnons à nos prochains celles qu’ils nous ont faictes ? Mais je ne veuls dire cecy, comme voulant inférer que les grands & énormes péchés puissent estre excusés sur les vices d’aultruy & que ce pendant ne devons nous efforcer, de nostre telle quelle puissance, que nostre vie soit le moins maculée de vices que faire ce pourra, mais, pour monstrer que ceuls sont grandement coulpables
