meilleur remede que ſa femme pouuoit auoir ? Car puis que par ſon bon traictemẽt il ne la pouuoit guerir, il vouloit eſſayer ſi le cõtraire luy feroit meilleur. Ce que tresbien il experimenta. Et m’esbahis comme vous, qui eſtes femmes, auez declaré la condition de voſtre ſexe, qui plus amende par deſpit, que par douceur. Sans point de faulte, diſt Longarine, vn deſpit me feroit bien, non ſeulement ſaillir du lict, mais du ſepulchre encores tel que ceſtuy lá. Et quel tort luy faiſoit il, diſt Saffredẽt, puis qu’il la penſoit morte, de ſe conſoler ? Car lon ſçait bien, que le lien de mariage ne peult durer ſinon autant que la vie, & puis apres on eſt deſlié. Ouy deſlié, diſt Oiſille, du ſerment de l’obligation : mais vn bon cueur n’eſt iamais deſlié d’amour. Et c’eſtoit bien toſt oublié ſon dueil, de ne pouuoir attendre que ſa femme euſt paſſé le dernier ſouſpir. Mais ce que ie trouue le plus eſtrãge, diſt Nomerfide, c’eſt, que, voyant la mort & la croix deuant ſes yeux, il ne perdit la volonté d’offenſer Dieu. Voila vne belle raiſon, diſt Simontault. Vous ne vous esbahiriez donc pas de veoir faire vne follie, mais que ce fuſt loing de l’egliſe, & du cimetiere. Mocquez vous tant de moy, que vous vouldrez, reſpondit Nomerfide, ſi eſt-ce que la meditation de la mort refroidiſt bien fort vn cueur, quelque ieune qu’il ſoit. Ie ſerois bien de voſtre opinion, diſt Dagoucin, ſi ie n’auois ouy dire le contraire à vne princeſſe. C’eſt donc à dire, diſt Parlamente, qu’elle racompta quelque hiſtoire. Parquoy s’il eſt ainſi, ie vous donne ma place pour la dire. Dagoucin cõmença ainſi.
Continuelle repentance d’vne relivieuſe, pour auoir perdu ſa virginité
ſans force, ny par amour.
NOVVELLE SEPTANTEDEVXIESME.
n vne des meilleures villes de France apres
Paris, y auoit vn hoſpital richement
fondé : c’eſt à ſçauoir, d’vn prieuré de quinze
ou ſeize religieuſes, & en vn autre corps
de maiſon deuant iceluy, y auoit vn prieur
& ſept ou huict religieux, qui tous les iours
diſoient le ſeruice : & les religieuſes ſeule-
