Page:Marguerite de Navarre - L'heptaméron des nouvelles, 1559.pdf/422

LA VII. IOVRNEE DES NOVVELLES

eſtre autre que vous. Ie vous ay en mon cueur. Ie vous tiens entre mes bras. I’ay vn enfant en mon ventre, auquel vous viuez, & ne puis auoir voſtre amour, comme vous auez le mien. Mais tant plus ie vous ſuis loyale & fidele, tant plus vous m’eſtes cruel & auſtere : qui me faict mille fois deſirer le iour par vne ſoudaine mort deliurer voſtre enfant d’vn tel pere, & moy d’vn tel mary : ce que i’eſpere faire bien toſt, puis que preferez vn ſeruiteur infidele à voſtre femme, telle que ie vous ſuis, & à la vie de la mere, & d’vn fruict, qui eſt voſtre, lequel s’en va perir, ne pouuãt obtenir de vous, ce que plus ie deſire ſçauoir. Ce diſant, embraſſa & baiſa ſon mary, arrouſant tout ſon viſage de ſes larmes, auec tels cris & ſouſpirs, que le bõ prince, qui craignoit perdre ſa femme & enfant tout enſemble, ſe delibera de luy dire vray : mais luy iura que, ſi elle le reueloit à creature du mõde, elle ne mourroit d’autre main que de la ſiẽne. A quoy elle ſe condãna, & accepta la punition. A l’heure le pauure mary deceu luy racõpta tout ce qu’il auoit veu, depuis vn bout iuſqu’à l’autre : dõt elle feit ſemblant d’eſtre fort contente, mais en ſon cueur penſoit bien le contraire. Toutesfois pour la crainte du Duc, diſsimula le mieux qu’elle peuſt ſa paſsion. Et le iour d’vne grande feſte, que le Duc tenoit ſa court, ou il auoit mandé toutes les dames du païs, & entre autres ſa niece : apres le feſtin, les dãces commancerẽt, ou chacun feit ſon deuoir. Mais la Ducheffe, qui eſtoit tourmentée, voyant la beauté & bonne grace de ſa niece, ne ſe pouoit reſiouïr, & moins garder ſon deſpit de paroiſtre. Car ayant appellé toutes les dames, qu’elle feit aſſeoir aupres d’elle, commença à releuer propos d’amour, & voyant que ſa niece ne parloit point, luy diſt, auec vn cueur creué de ialouſie : Et vous, belle niece, eſt il poſsible, que voſtre beauté ſoit ſans amy ou ſeruiteur ? Ma dame (ce luy reſpondit elle) ma beauté ne m’a point faict de tel acqueſt : car depuis la mort de mon mary, n’ay voulu auoir d’autres amis que ſes enfans, dont ie me tiens pour contente. Belle niece, belle niece (luy reſpondit la Ducheſſe, par vn extreme deſpit) il n’y a amour ſi ſecrette, qui ne ſoit ſceuë, ny petit chien ſi affetté ny faict à la main, duquel on n’entende le iapper. Ie vous laiſſe penſer, mes dames, quelle douleur ſentit au cueur ceſte pauure dame, voyant vne choſe tant couuerte, eſtre à ſon deshõneur declarée. L’hõneur ſi ſon-

gneu-