Page:Marguerite de Navarre - L'heptaméron des nouvelles, 1559.pdf/420

LA VII. IOVRNEE DES NOVVELLES

grande beauté de ſa niece, ne douta point qu’elle ne fuſt plus aggreable que ſa femme : mais ne pouuant entendre qu’vn tel miſtere ſe peuſt conduire ſans moyen, le pria de luy dire comment il la pouuoit veoir. Le gentil-homme luy compta, cõme la chambre de ſa dame ſailloit dedans vn iardin, & que, le iour qu’il y deuoit aller, on laiſſoit vne petite porte ouuerte, par ou il entroit à pied, iuſques à ce qu’il oyoit iapper vn petit chien, que la dame laiſſoit aller par le iardin, quand toutes ſes femmes eſtoient retirées, & à l’heure il s’en alloit parler à elle toute la nuict, & au partir luy aſsignoit iour, qu’il y deuoit retourner, ou ſans trop grãdes excuſes n’auoit encores failly. Le Duc, qui eſtoit le plus curieux homme du monde, & qui en ſon temps auoit fort bien mené l’amour, tãt pour ſatisfaire à ſon ſoupcon, que pour entendre vne ſi eſtrange hiſtoire, le pria de le mener auecques luy la premiere fois, non comme maiſtre, mais comme compagnon. Le gentil-homme, pour en eſtre ſi auant, luy accorda. Dont le Duc fut plus aiſe, que s’il euſt gaigné vn royaume, & feignant s’en aller repoſer en ſa garderobbe, feit venir deux cheuaux pour luy & le gentil-homme, & toute la nuict ſe meirẽt en chemin pour aller ou ſa niece ſe tenoit, laiſſans leurs cheuaux hors la cloſture. Le gentil-homme feit entrer le Duc au jardin par le petit huys, le priant demeurer derriere vn gros noyer, duquel lieu il pouuoit veoir, s’il diſoit vray, ou non. Ils n’eurent guieres demeuré au iardin, que le petit chiẽ commença à iapper, & le gentil-homme marcha deuers la tour, ou ſa dame ne faillit à venir au deuant de luy, & le ſaluant & l’embraſſant, luy diſt qu’il ſembloit auoir eſté mil ans ſans le veoir. Et à l’heure entrerent dedans la chambre, qu’ils laiſſerent ouuerte, ou le Duc entra ſecrettement apres eux, car il n’y auoit aucune lumiere : lequel entendant tout le diſcours de leur chaſte amitié, ſe tint plus que ſatisfaict, & attendit lá non trop longuemẽt : car le gentil-homme diſt à ſa dame, qu’il eſtoit contraint de retourner pluſtoſt qu’il n’auoit accouſtumé, pource que le Duc deuoit des quatre heures aller à la chaſſe, ou il n’oſoit faillir. La dame, qui aimoit mieux ſon honneur que ſon plaiſir, ne le voulut retarder de faire ſon deuoir : car la choſe que plus elle eſtimoit en leur honneſte amitié, c’eſtoit, qu’elle eſtoit ſecrette deuant tous les hommes. Ainſi ſe partit ce gentil-homme à vne

heure