Page:Marguerite de Navarre - L'heptaméron des nouvelles, 1559.pdf/418

LA VII. IOVRNEE DES NOVVELLES

voulu differer & diſsimuler ſon affection autant qu’il tenoit chere ſa vie, fut contrainct, voyant la ialouſie de ſon maiſtre, luy iurer que veritablement il en aimoit vne, de laquelle la beauté eſtoit telle, que celle de la Ducheſſe, & de toute ſa compagnie n’eſtoit que laydeur & difformité au pris : le ſuppliant de ne le contraindre iamais de la luy nommer : car l’accord de luy & de s’amie eſtoit de telle ſorte, qu’il ne ſe pouuoit rompre, ſinon par celuy qui premier le declareroit. Le Duc luy promiſt de ne l’en preſſer point, & fut tant content de luy, qu’il luy ſeit meilleure chere qu’il n’auoit encores faict. Dont la Ducheſſe s’apperceut tresbien, & vſant de fineſſe accouſtumée, meit peine d’entendre l’occaſion. Ce que le Duc ne luy cela. Dont auecques ſa vengeance s’engendra vne forte ialouſie, qui la feit ſupplier le Duc de commander à ce gentil-homme de luy nommer ceſte amie, l’aſſeurant que c’eſtoit menſonge, & le meilleur moyẽ que lon pourroit trouuer pour l’aſſeurer de ſon dire : mais que s’il ne luy nommoit celle, qu’il eſtimoit tant belle, il eſtoit le plus ſot prince du monde, s’il adiouſtoit foy à ſa parole. Le pauure ſeigneur, duquel la femme tournoit l’opinion comme il luy plaiſoit, s’en alla promener tout ſeul auec ce gentil-homme, luy diſant qu’il eſtoit encores en plus grande peine qu’il n’auoit eſté : car il doutoit fort, qu’il luy auoit baillé vne excuſe, pour le garder de ſoupçonner la verité, qui le tourmentoit plus que iamais. Parquoy luy pria tant qu’il eſtoit poſsible, de luy declarer celle qu’il aimoit ſi fort. Le pauure gentil-homme le ſupplia de ne le contraindre à faire vne telle faulte enuers celle qu’il aimoit ſi fort, que de luy rompre vne promeſſe, qu’il auoit tenuë ſi long temps, & de luy perdre en vn iour ce qu’il auoit conſerué plus de ſept ans : & qu’il aimeroit mieux endurer la mort, que de faire vn tel tort à celle, qui luy eſtoit ſi loyale. Le Duc, voyant qu’il ne luy vouloit dire, entra en vne ſi forte ialouſie, que auecques vn viſage furieux, luy diſt : Or choiſiſſez des deux choſes l’yne, de me dire celle que vous aimez plus que toutes, ou de vous en aller banny des terres ou i’ay authorité : à la charge que, ſi ie vous y trouue huict iours paſſez, ie vous feray mourir de cruelle mort. Si iamais douleur ſaiſit le cueur d’vn loyal ſeruiteur, elle print celuy de ce pauure gẽtil-homme, lequel pouuoit bien dire, Anguſtiæ ſunt mihi vndique :

car d’vn