Page:Marguerite de Navarre - L'heptaméron des nouvelles, 1559.pdf/389

186

DE LA ROYNE DE NAVARRE.

la vindrent veoir, pource qu’elle eſtoit autant aimée, que femme pouuoit eſtre. Entre autres la vint veoir vne damoiſelle, qui eſcoutoit que chacun luy diſoit tous les cõptes qu’ils penſoiẽt, pour luy faire paſſer le tẽps. Elle ſ’aduiſa qu’elle ne feroit moins que les autres, & luy dit : Ma dame, i’ay à vous faire vn beau cõpte, mais vous me promettrez de n’en parler point. A l’heure luy diſt : Ma dame, le cõpte que ie vous feray eſt tres-veritable, ie le prens ſur ma conſcience. C’eſt, qu’il y auoit vne damoiſelle maryée, qui viuoit auec ſon mary treshonneſtement, combien qu’il fuſt vieil & elle ieune. Vn gentil-homme ſon voiſin, voyãt qu’elle auoit eſpouſé ce vieillard, fut amoureux d’elle, & la preſſa par pluſieurs années : mais iamais il n’eut reſponſe d’elle, ſinon telle qu’vne femme de bien doit faire. Vn iour penſa le gentil-homme, que ſ’il la pouuoit trouuer à ſon auantage, que par auenture elle ne luy ſeroit ſi ririgoureuſe. Et apres auoir long tẽps debatu auec la crainte du danger ou il ſe mettoit, l’amour qu’il auoit à la damoiſelle luy oſta tellement la crainte, qu’il ſe delibera chercher le lieu & l’occaſion. Et feit ſi bon guet, qu’vn matin, ainſi que le gentil-homme, mary de ceſte damoiſelle, ſ’en alloit en quelque autre de ſes maiſons, & partoit des le poinct du iour, pour la chaleur, le ieune folaſtre vint en la maiſon de ceſte ieune damoiſelle laquelle il trouua dormant en ſon lict, & aduiſa, que ſes chambrieres ſ’en eſtoiẽt allées hors de la chambre, & ſans auoir le ſens de fermer la porte, ſe vint coucher tout houzé & eſperonné, dedans le lict de la damoiſelle. Et quand elle ſ’eſueilla, fut autant marrie, qu’il eſtoit poſsible : mais quelques remonſtrances, qu’elle luy ſceuſt faire, il la print par force, luy diſant, que ſi elle reueloit ceſt affaire, il le diroit à tout le monde, & qu’elle l’auoit enuoyé querir : dont la damoiſelle eut ſi grand peur, qu’elle n’oſa crier. Aprés arriua vne des chambrieres dedans la chambre, parquoy le gentil-homme ſe leua bien haſtiuement, & ne ſ’en fuſt perſonne aperceu, ſinon que l’eſperon, qui ſ’eſtoit attaché au linceul de deſſus, l’emporta tout entier : en ſorte, que la damoiſelle demeura toute nuë ſur ſon lict. Et combien qu’elle feiſt le compte d’vne autre, ſi ne ſe peut elle garder de dire à la fin : Iamais femme ne fut plus eſtonnée que moy, quand ie me trouuay toute nuë. A l’heure la dame, qui auoit eſcouté tout le compte ſans rire, ne ſ’en peut tenir à ce der-

Aa ij