Page:Marguerite de Navarre - L'heptaméron des nouvelles, 1559.pdf/230

LA III. IOVRNEE DES NOVVELLES

traire. Car ainſi qu’il faillit d’vn coſté dedans le lict, elle ſortit de l’autre, & print ſa chamarre, de laquelle veſtuë s’en vint à luy au cheuet du lict, & luy diſt : Comment ? monſieur, auez vous penſé que les occaſions puiſſent muer vn chaſte cueur ? Croyez que tout ainſi que l’or s’eſprouue en la fournaiſe, auſsi faict vn cueur chaſte au milieu des tentations, ou ſouuẽt ſe trouue plus fort & vertueux qu’ailleurs, & ſe refroidiſt tant plus il eſt aſſailly de ſon contraire. Parquoy ſoyez ſeur, que ſi i’auois autre volonté, que celle que ie vous ay dicte, ie n’euſſe failly à trouuer des moyens, deſquels n’en voulant vſer, ie n’en tiens compte. Vous priant que ſi vous voulez que ie continue l’affection que ie vous porte, que vous oſtiez non ſeulement la volonté, mais la pensée de iamais, pour choſe que vous ſceuſsiez faire, me trouuer autre que ie ſuis. Durant ces parolles arriuerent ſes femmes, auſquelles elle commanda que lon apportaſt la collation de toutes ſortes de confitures.^Mais il n’auoit pour l’heure ny faim ny ſoif, tant eſtoit deſeſperé d’auoir failly à ſon entreprinſe, craignant que la demonſtration qu’il auoit faicte de ſon deſir luy feit perdre la priuauté qu’il auoit auec elle. Le mary ayant donné ordre au feu, retourna & pria tant monſieur d’Auannes qu’il demeuraſt pour ceſte nuict en ſa maiſon, qu’il luy accorda. Mais fut ceſte nuict paſsée en telle ſorte que ſes yeux furent plus excercez à plorer, qu’à dormir. Et bien matin leur alla dire à dieu dans le lict, ou en baiſant la dame cogneut bien qu’elle auoit plus de pitié de ſon offenſe, que de mauuaiſe volonté encontre luy : qui fut vn charbon d’auantage adiouté au feu de ſon amour. Apres diſner s’en alla auecques le Roy à Taffares, mais auant que partir, encores alla dire à dieu à ſon bon pere & à ſa dame qui depuis le premier commandement de ſon mary, ne feit plus difficulté de le baiſer comme ſon fils. Mais ſoyez ſeur, que plus la vertu empeſchoit ſon œil & contenance, de monſtrer la flamme cachée, plus elle s’augmentoit, & deuenoit importable : en ſorte que ne pouuant porter la guerre que l’honneur & l’amour luy faiſoient en ſon cueur (laquelle toutesfois auoit deliberé de iamais ne monſtrer, ayant perdu la conſolation de la veuë, & parolle de celuy pour qui elle viuoit) print vne ſieüre continue causée d’vne humeur melancolique & couuerte, tellement que les extremitez du corps luy

vindrent