temporelle nous conſoler & deliurer de toutes noz tribulations, cognoiſſant que ſouuent l’ange ſatan ſe transforme en ange de lumiere, à fin que l’œil exterieur aueuglé par l’apparence de ſaincteté & de deuotion, ne ſ’arreſte à ce qu’il doibt fuir : il me ſemble bon de vous en racompter vne aduenuë de noſtre temps.
Trois meurtres aduenuz en vne maiſon : à ſçauoir, en la perſonne du ſeigneur, de ſa femme, & de leur enfant, par la meſchanceté d’vn Cordelier.
NOVVELLE VINGTTROSIESME.
v pays de Perigord y auoit vn gentilhomme,
qui auoit telle deuotion à ſainct
François, qu’il luy ſembloit, que tous ceux
qui portoient ceſt habit, debuoient eſtre
ſemblables au bon ſainct. En l’honneur de
quoy auoit fait faire en ſa maiſon chambre
& garderobbe propre pour les loger,
par le conſeil deſquels il conduiſoit toutes ſes affaires, voire
iuſques aux moindres choſes de ſon meſnage, ſ’eſtimant cheminer
ſeurement en ſuyuant leur bon conſeil. Or aduint vn
iour que la femme de ce gentil-homme, qui eſtoit belle, & non
moins ſage que vertueuſe, auoit faict vn beau fils, dont l’amitié
que luy portoit ſon mary, augmenta doublement. Et pour feſtoyer
la commere, enuoya querir vn ſien beau frere. Ainſi que
l’heure du ſoupper fut venuë, arriua vn cordelier, duquel ie celeray
le nom pour l’honneur de la religion. Le gentil-homme
fut fort aiſe voyant ſon pere ſpirituel, deuant lequel il ne cachoit
nul fecret. Et apres pluſieurs propos tenuz entre ſa femme,
ſon beau frere, & luy, ſe miſrent à table pour ſoupper, durant
lequel ce gentil-homme regardant ſa femme, qui auoit
aſſez de beauté & de bonne grace, pour eſtre deſirée, commença
à demãder tout hault vne queſtion au beaupere : Mon pere,
eſt il vray qu’vn homme peche mortellement de coucher auec
ſa femme, pendant qu’elle eſt en couche ? Le beaupere, qui auoit
la contenance & la parolle contraire à ſon cueur, luy reſpondit :