NOVVELLE VINGTIESME.
v pays du Dauphiné, y auoit vn gentil-homme,
nommé le ſeigneur du Ryant,
qui eſtoit de la maison du Roy Frãçois premier
de ce nom, autant beau & honneſte
qu’il eſtoit poſsible de veoir. Il fut longuement
ſeruiteur d’vne dame vefue, laquelle
il aimoit & reueroit tant, que de peur qu’il
auoit de perdre ſa bõne grace, ne l’oſoit importuner de ce qu’il
deſiroit le plus. Et luy, qui ſe ſentoit beau & digne d’eſtre aimé,
croyoit fermement ce qu’elle luy iuroit ſouuẽt : c’eſt, qu’elle l’aimoit plus que tous les gentils-hommes du mõde, & que ſi elle
eſtoit contrainte de faire quelque choſe pour vn gentil-homme,
ce ſeroit pour luy ſeulement, comme le plus parfait qu’elle
auoit iamais cogneu, & luy prioit de ſe contenter ſeulement,
ſans oultrepaſſer, de ceſte honneſte amitié, l’aſſeurant que ſi elle
cognoiſſoit qu’il pretendiſt d’auantage, fans fe contenter de la
raiſon, que du tout il la perdroit. Le pauure gentil-homme non
ſeulement ſe contentoit de cela, mais ſe tenoit tresheureux d’auoir
gaigné le cueur de celle qu’il penſoit tant honneſte. Il ſeroit long de vous racompter le diſcours de ſon amitié & lõgue
frequentation qu’il eut auec elle, & les voyages qu’il faiſoit pour
la venir veoir. Mais pour concluſion, ce pauure martir d’vn feu
ſi plaiſant, que plus on en bruſle, plus on en veult bruſler, cherchoit
touſiours le moyen d’augmenter ſon martire. Et vn iour
luy print fantaſie d’aller veoir en poſte celle qu’il aimoit plus
que luy meſme, & qu’il eſtimoit par deſſus toutes les femmes
du monde. Luy arriué, alla en la maiſon, & demanda ou elle eſtoit.
On luy diſt qu’elle ne faiſoit que venir de veſpres, & eſtoit
entrée en ſa garenne, pour acheuer ſon ſeruice. Il deſcendit de
cheual, & ſ’en va tout droit à la garenne ou elle eſtoit, & trouua
ſes femmes qui luy dirent, qu’elle ſ’en alloit toute feule promener
en vne grande allée, eſtant en ladicte garenne. Il commença
plus que iamais à eſperer quelque bonne fortune pour
luy. Et le plus doulcement qu’il peut, ſans faire bruit, la chercha
le mieulx qu’il luy fut poſsible, deſirant ſur toutes choſes de la
pouuoir trouuer ſeule. Mais quand il fut aupres d’vn pauillon
