voit que, depuis mon partement de la cour, Dieu luy avoit faict la grace de si bien servir le Roy en sa charge de l’armée qui luy avoit esté commise, qu’il avoit pris toutes les villes qu’il luy avoit commandé d’attaquer, et chassé tous les huguenots de toutes les provinces pour lesquelles son armée estoit destinée ; qu’il estoit revenu à la cour à Poictiers, où le Roy estoit pendant le siege de Brouage, pour estre plus pres pour secourir l’armée de monsieur de Mayenne de ce qui lui seroit nécessaire ; que comme la cour est un Prothée qui change de forme à toute heure, y arrivant tous les jours des nouvelletez, qu’il l’avoit trouvée toute changée ; que l’on avoit faict si peu d’estat de luy que s’il n’eust rien faict pour le service du Roy ; que Bussy, à qui le Roy faisoit bonne chere avant que partir, et qui avoit servy le Roy en cette guerre de sa personne et de ses amis, jusques à y avoir perdu son frere à l’assault d’Issoire, estoit aussy desfavorisé et persecuté de l’envie qu’il avoit esté du temps du Guast ; que l’on leur faisoit tous les jours, à l’un et à l’aultre, des indignitez ; que les mignons[1], qui estoient auprès du Roy, avoient
- ↑ Ce fut en 1576, dit Lestoile, que « le nom de mignons commença à trotter par la bouche du peuple, auquel ils estoient fort odieux, tant pour leurs façons de faire, qui estoient badines et hautaines, que pour leurs fards et accoustremens effeminés et impudiques, mais surtout pour les dons immenses et liberalités que leur faisoit le Roy… Ces beaux mignons portoient leurs cheveux ongués, frisés et refrisés par artifices, remontans par dessus leurs petis bonnets de velours…, et leurs fraises de chemises de toiles d’atour empezées et longues de demi-pied, de façon qu’à voir leur teste dessus leur fraize, il sembloit que ce fust le chef saint Jean dans un plat… Leurs exercices estoient de jouer, blasphemer, sauter, danser, volter, quereller et
