neur de conduire la royne Elizabeth[1] ses nopces à Mezieres, lors qu’elle vint espouser le roy Charles mon frere, et ma sœur aisnée au roy d’Espaigne son mary), femme qui estoit tenue en grande estime de l’imperatrice, de l’empereur, et de tous les princes chrestiens ; sa sœur madame la Lantgravine[2], madame d’Aremberg sa fille[3], monsieur le comte d’Aremberg son filz[4], tres-honneste et gallant homme, vive image de son pere, qui amenant le secours d’Espaigne au roy Charles mon frere, s’en retourna avec beaucoup d’honneur et de reputation.
Cette arrivée, toute pleine d’honneur et de joye, eust esté encor plus agréable, sans le malheur qui arriva de la mort de madamoiselle de Tournon ; de qui l’histoire estant si remarquable, je ne puis obmettre à la raconter, faisant cette digression à mon discours. Madame de Tournon, qui estoit lors ma dame d’honneur, avoit plusieurs filles, desquelles l’aisnée[5] avoit espousé monsieur de Balançon, gouverneur pour le Roy d’Espaigne au comté de Bourgongne ; et s’en allant à son mesnage, pria sa mere, madame de Tournon, de luy bailler sa sœur, madamoiselle de Tournon, pour la nourrir avec elle, et luy tenir compagnie en ce païs, où elle estoit esloingnée de tous ses parens. Sa
