avoir, n’ayant moyen de pouvoir tirer des batteaux ny mes gens, ny mes hardes, ny moins d’aller par la ville, qui estoit comme submergée dans ce deluge, duquel elle ne fust avec moins de merveille delivrée que saisie ; car, au poinct du jour, l’eaue estoit toute retirée et remise en son lieu naturel.
Partant de là, monsieur et madame d’Havrech s’en retournerent à Namur trouver dom Juan ; et moy, je me remis dans mon batteau pour aller ce jour là coucher à Liege, où l’evesque[1], qui en est seigneur souverain, me receust avec tout l’honneur et demonstration de bonne volonté, qu’une personne courtoise et bien affectionnée peut tesmoingner. C’estoit un seigneur accompaigné de beaucoup de vertus, de prudence, de bonté, et qui parloit bien François ; agreable de sa personne, honnorable, magnificque et de compagnie fort agreable ; accompagné d’un chapitre et plusieurs chanoines, tous fils de ducs, comtes, ou grands seigneurs d’Allemaigne, pour ce que cet evesché, qui est un estat souverain de grand revenu, d’assez grande estendue, remply de beaucoup de bonnes villes, s’obtient par election, et fault qu’ilz demeurent un an residants, et qu’ilz soient nobles pour y estre reçeus chanoines. La ville est plus grande que Lion, et est presque en mesme assiete, la riviere de Meuse passant au milieu ; tres-bien bastie, n’y ayant maison de chanoine qui ne paroisse un beau palais ; les rues grandes et larges ; les places belles, accompagnées de tres-belles fontaines ;
- ↑ Gérard de Groesbek, évêque de Liège en 1564, créé cardinal en 1678, mort en 1584.
