Puis ils ont du Tolotna qui est de l’auoine eschaudée puis sechée, laquelle on reduit en farine. Ils s’en seruent en diverses manieres, tant pour manger que pour boire, mettans deux ou trois cuillières de ladite farine dans vn bon traict d’eau, et deux ou trois grains de sel, la remuent, la boiuent, et tiennent cela pour du bon et sain breuuage. Puis du porc, du bœuf et du mouton sallé, et sechez à la fumée, du beurre et du fromage seché, et pilé menu comme sablon, auec vne cuillerée ou deux, duquel ils font du potage, puis force eauë de vie, auec quelque poisson seché et sallé, lequel ils mangent sans faire cuire. Cecy est la prouision des principaux : car pour les autres, ils se contentent de biscuit, quelque Crup d’auoine, et Tolotna, auec vn peu de sel. Ils ne se mettent gueres souuent en campagne contre le Tartare, qu’ils ne commencent à veoir l’herbe sous les pieds. Quant aux autres ennemys, s’ils ne viennent inesperement, l’on tient le mesme ordre, ainsi les Empereurs ne dépendent guere plus ; quant à la gendarmerie, ayant guerre que n’en ayant point, si ce n’est en recompensant ceux qui ont fait quelque seruice ; à sçauoir, pris vn prisonnier ou tué vn des ennemys, receu quelque blesseure, et choses semblables. Car on leur donne de l’argent selon la qualité de la personne, vne piece de drap d’or, ou autre estoffe de soye pour luy faire vn habit.
Lés Empereurs de Russie ont correspondance auec l’Empereur des Romains, les Roys d’Angleterre et de Dannemarc, et auec le Roy de