nombre de Ducats, soit en des gobelets ou tasses d’argent, ou dans des plats couuerts de taffetas, ils sont aussi rencheris quelques iours auant Pasques ; car depuis ledit iour iusques à huict iours apres Pasques, la façon est que l’on s’entrevisite, et baise auec des œufs rouges, comme auons touché cy-deuant, mais l’on va visiter les grands, et ceux desquels l’on a affaire, leur offrant auec l’œuf quelques ioyaux, perles, ou quelques ducats, car c’est la seule saison de toute l’année en laquelle ils osent prendre, encores faut-il que ce soit secrettement, car cette saison n’excuse pas si l’on prend chose de plus grande valeur que de dix ou douze Roubles.
Le plus grand office de Russie est le grand Maistre de l’Escurie, qu’ils appellent Conusnej Baiarj, puis celuy qui a la suruoyance des medecins et apoticaires, lequel ils nomment Abtesqui Baiarj puis le Maistre d’hostel, et apres l’eschanson ces quatre Offices sont des premiers du Conseil. Apres ce il y a diuers Offices, comme Stolnic Tshesnic Strepsik, pages et autres, en grand nombre : la Garde de l’Empereur est composée de dix mille Strelits qui resident en la ville de Mosco, ce sont arquebuziers, ils n’ont qu’vn General : ils sont diuisez en Pricas, qui est vne compagnie de cinq cens, sur lesquels ils ont vn Goloua que nous nommerons Capitaine, chacune centaine d’hommes a vn Centenier, et chaque dix hommes vn Decetnic, que nous nommerons Caporal, ils n’ont Lieutenant ny Enseigne : chacun Capitaine selon les seruices qu’il a faicts, a trente, quarente, iusques à soixante Roubles de gages annuels,
