abhorent, comme aussi le Muscq, la Ciuete, et autres telles choses. Mais si les simples sont malades, ils prennent coustumierement vn bon traict d’eau de vie, et y mettent vne charge de poudre d’arquebouze dedans, ou bien vne teste d’ail pilée, remuent cela et le boiuent, et vont à l’instant à vne estuue, laquelle est si chaude, que l’on n’y sçauroit presque durer, et y demeurent iusques à ce qu’ils ayent sué vne heure ou deux, et en vsent de mesme en toute sorte de maladies.
Quant au reuenu de l’Empire l’on tient cet ordre. Premierement le Domaine de l’Empereur vient en vn office qu’il appelle de Vorest, sur lequel office le maistre d’hostel a la superintendance, et en iuge auec deux Diacs, outre ce le païs est divisé en cinq Offices, qu’ils appellent Setuart, ausquels offices l’on apporte les reuenus ordinaires, outre ce, il y a vn autre Office qu’ils appellent Bolshoi Prichod, lequel Office a la suruoyance desdits Setuarts, et mesmes s’il y a quelques impost extraordinaires, ils sont tous apportez audit Prichod : le reuenu de l’Empereur outre son Domaine consiste en tailles, qu’il faut que non seulement les villes payent, mais aussi tous les paysans, n’en exemptans pas les terres hereditaires de ceux du sang : puis en imposts et gabelles de toutes sortes de marchandises, et sur les cabarests où ils vendent eau de vie, medon ou idromel et ceruoise, car il ne s’en oseroit vendre par toute la Russie, que par ceux qui ont affermé les cabarests en chaque ville ou village, puis sur les Pelleteries, Cire et autres marchandises. Or le Domaine de