pierre, il y en a aussi vn nombre infiny de bois, et mesmes les rues sont pauées ou planchées de bois.
La principalle Noblesse réside tousiours à Mosco, à sçauoir les Knez (qui veut dire Ducz) puis ceux du Conseil qui se nomment Donmey Bayarin, puis les Acolintshes, qui sont Mareschaux ; puis les Donmey Deuorenne, et d’autres Moscoffqui Deuorenne. D’iceux sont choisis les Chefs et Gouuerneurs des Villes. Il n’y a au Conseil aucun certain nombre : car il dépend de l’Empereur d’en faire autant que bon luy semble. I’en ay cognu iusques à trente-deux. Le secret Conseil est coustumierement des plus proches du Sang, en matiere de grande consequence. L’on prend (par forme) l’aduis des Ecclesiastiques, faisant venir le Patriarche auec quelques Euesques au Conseil, combien qu’il n’y a à parler proprement nulle loy, ny conseil, que la volonté de l’Empereur, soit bonne ou mauvaise, à mettre tout à feu et à sang, innocens ou coulpables. Ie le tiens pour l’vn des plus absolus Princes qui soit : Car tous ceux du païs, soit Nobles ou Innobles ; les freres mesmes de l’Empereur s’appellent Clops hospodaro, qui est à dire, Esclaues de l’Empereur. Ils admettent outre plus au Conseil deux Domnei Diac, lesquels ie tiens plustost pour Secretaires que pour Chancelliers, combien qu’ils le font ainsi interpreter. L’vn est celuy dans l’office duquel l’on dépesche tous Ambassadeurs et negoces forains. L’autre est celuy en l’office duquel tous gens de guerre ont leurs expeditions, tant Lieutenans Generaux, Gouuerneurs des Villes, qu’au-