de faire si hautaines, et leurs habits si somptueux, que l’on les eust tous iugez estre Princes ou Princesses, car les femmes allans au Temple n’estoient vestuës d’autre estoffe que de velours, satin, damas, et la moindre de taffetas, combien qu’elle n’eust eu vaillant autre chose : leur gain principal consistoit en la liberté qu’ils auoient de vendre eau de vie, medon, et autre sorte de breuuage, sur lequel ils gaignent non dix pour cent, ains cent pour cent ; ce qui semblera incroïable, mais neantmoins c’est la verité.
Et bien que les Liuoniens soient et ont esté tousiours tels, si eust-on iugé qu’ils auoient esté amenez en Russie, pour y faire veoir leur vanité et insolence, qu’en leur propre païs ils n’eussent osé prattiquer, à cause des loix et de la iustice, et finalement leur fut donné vne place hors la Ville, pour y bastir leurs maisons et vne Eglise, n’estant depuis permis à aucuns d’iceux de demeurer en la ville de Mosco. Il se trouue mesmes des Tartares, Turcs, et Persiens, outre les Mordouites, et autres nations Mahometanes, soubs la domination des Russes qui tiennent chacun leur Religion, sans les Siberiens, Lapes, et autres, lesquels ne sont ny Chrestiens, ny Mahometains. Ains adorent certains animaux, selon leur fantaisie, sans estre forcez en leur Religion.
Ils ne gardent iamais leurs morts vingt-quatre heures, soit Prince ou Esclaue. Ains s’il meurt le matin, il est enterré le soir, ils ont ordinairement vn nombre de femmes pour pleurer leurs morts, lesquels l’interroguent pour-