la Russie n’a jamais esté en plus grande vogue qu’alors. Et pour ce que cecy ne semble estre vray-semblable, ie marqueray cy-apres la forme qu’ils practiquent à leuer tant de gens, selon ce que i’en ay veu et appris. Mais pour finir ceste guerre, il ne se trouua autre ennemy qu’vn Ambassadeur auec enuiron cent hommes vestus de peaux de mouton selon leur coustume, mais tres-bien montez, qui venoient pour traicter quelque accord de la part du Tartare. Dequoy Boris estoit bien informé auparauant. Cet accord luy acquit vn tres-grand renom : car apres auoir faict veoir à l’Ambassadeur toutes les forces de Russie, faict ioüer plusieurs fois tout le canon, lequel estoit rangé des deux costez d’vn chemin, large de deux virst, ou enuiron, et les pieces assez esloignées l’vne de l’autre, faisant passer ledit Ambassadeur quelquesfois entre lesdites pieces, finallement le renuoya auec force presens, ainsi apres auoir licencié l’armée, vint ledit Boris Federuits en la ville de Mosco, en grand triomphe. Le bruit courant lors que le Tartare entendu sa venuë, n’auoit osé passer outre, et fut ledit Boris couronné le premier Septembre 1598. qui est leur premier iour de l’an.
Ce Païs reçeut le Christianisme, y a enuiron 700. ans, premierement par vn Euesque de Constantinople. Ils tiennent la Religion Grecque, ils baptisent les enfans, les plongeans trois fois dans l’eau : Au nom du Pere, du Fils, et du Sainct Esprit : Puis le Prestre leur pend vne Croix au col, laquelle il reçoit du Parrain, pour tesmoigner du Baptesme, laquelle il porte