et son fils Iohannes Basilius. Le Prince du païs fut pris prisonnier dans ladite ville de Casan, par Iohannes Basilius, et est encore en vie en Moscovie ; il s’appelle Tsar Simeon. Ladite ville est battuë de cette fameuse riuiere de Volga, dans laquelle se rend la riuiere de Oca. Les Sheremises habitent prés de ladite Ville, au de là de Casan, est vn grand païs, qui consiste du long de la Volga, (laquelle se va rendre en la mer Caspienne à Astrican) tout en campagnes, lesquelles ne sont peuplées : mais il y a quelque Chasteau basty sur ladite riuiere : Il y a de Casan à Astrican, quelques 2000. virst. C’est vne Ville forte, laquelle est de plus grand commerce, qu’aucune en toute la Russie, et fournit presque toute la Russie de sel, et de poisson sallé : L’on tient que c’est vn païs tres fertile : car il se trouue entre Casan et Astrican, aux campagnes, force petits ceriziers, portans fruit en la saison, et mesmes quelques seps de vigne sauuage. Il se trouue en ladite ville de Astrican, beaucoup de bons fruicts : et alentour se trouue la plante animale, de laquelle iadis aucuns Autheurs ont escrit, à sçauoir des Moutons qui croissent hors la terre, lesquels sont attachez à la racine, comme par vn boyau de deux ou trois brasses au nombril. Ledit Mouton mange l’herbe alentour de soy, et puis meurt. Ils sont de la grosseur d’vn aigneau, la laine frizée : des peaux s’en trouue aucunes toutes blanches, et d’autres vn peu picotées. I’en ai veu diuerses peaux ; Ce païs a esté conquis par Iohannes Basilius : Les Anglois y ont trafiqué durant sa vie, et de là en Perse.
Page:Margeret - Estat de l'empire de Russie.pdf/30
Le texte de cette page a été corrigé et est conforme au fac-similé.
![](http://upload.wikimedia.org/wikipedia/commons/thumb/d/dd/Margeret_-_Estat_de_l%27empire_de_Russie.pdf/page30-1024px-Margeret_-_Estat_de_l%27empire_de_Russie.pdf.jpg)