conuaincu de trahison, et luy fust prouué par les Annalles de Russie, et par son comportement enuers Boris, que luy ny leur maison n’auoient iamais esté fideles seruiteurs de leurs princes, et mesmes fust ledit Demetrius prié par tous les assistans de le faire mourir, veu qu’il s’estoit tousiours trouué perturbateur du repos public : ie parle comme ayant oüy et veu le tout de mes yeux et oreilles, ce nonobstant il luy pardonna, combien que Demetrius sçauoit bien que nul n’osoit aspirer à la Couronne que ladite maison de Choutsqui : il pardonna aussi à plusieurs autres ; car il estoit sans soupçon.
Outre ce, s’il estoit vn imposteur, comme ils disent, et que la verité n’en ait esté cognue que peu de temps auant son assassinat, pourquoy ne fust-il constitué prisonnier ? ou pourquoy ne l’amenerent-ils vif sur la place publique, pour luy prouuer deuant le peuple là assemblé, qu’il estoit vn imposteur, sans l’auoir ainsi tué, et mis le païs en si grande diuision, dont plusieurs y ont perdu la vie ? Et faut que tout le païs croye, sans aucune autre preuue, le dire de quatre ou cinq hommes, qui estoient les principaux conspirateurs ? Puis, pourquoy est-ce que Vacilei Choutsqui et ses complices, ont pris tant de peine à controuuer des mensonges, pour le rendre odieux au peuple ? Car ils ont fait lire des lettres publiquement, lesquelles contenoient, que Demetrius vouloit donner la pluspart de la Russie au Roy de Pologne, comme aussi à son beau-pere le Palatin, enfin qu’il vouloit diuiser la Russie ? Item qu’il
