cy-apres, encores moins d’autre nation que Russe, s’ils le confessent, il faut sçauoir là où ils l’ont pris, veu qu’il n’y a eu nul Iesuite en toute la Russie auant la venue de Demetrius, si ce n’a esté auec des Ambassadeurs, lesquels l’on tient et regarde de si pres, qu’il est impossible qu’ils eussent peu emmener vn enfant hors de Russie. Or il est impossible de tirer vn enfant hors du païs par autre moyen, si ce n’est pendant les guerres, qu’Estienne Roy de Pologne a euës en Russie, il y a quelque trente ans, et quand bien ils auroient eu moyen d’en recouurer vn pendant les guerres de Suede et de Russie, comment est-il possible qu’ils en ayent recouuré vn qui n’a eu son parangon en Russie ? Puis ie pense qu’ils n’eussent sçeu l’esleuer si secrettement, que quelqu’vn des Estats de Pologne : et par consequent le Palatin Sendemier n’en eust esté finalement aduerty, or pour le moins nous confesserons ledit Demetrius n’auoir esté ignorant de ce qu’il estoit, que s’il eust esté nourry par des Iesuites, c’est sans doute qu’ils luy eussent appris à parler, et à lire et escrire en latin. Mais il est tres-certain qu’il ne parloit nullement latin, i’en puis tesmoigner, moins le sçauoit-il lire et escrire, comme ie puis monstrer par son nom qu’il a soubscrit, lequel n’est trop bien, et eust aussi fauorisé lesdits Iesuites plus qu’il ne faisoit, eu esgard qu’il n’y en auoit que trois en toute la Russie, qui vindrent apres les gens de guerre Polonnois, lesquels n’auoient autres Religieux, l’vn desquels Iesuites fust apres le couronnement de Demetrius à leur sollicitation, enuoyé à Rome.
Page:Margeret - Estat de l'empire de Russie.pdf/126
Le texte de cette page a été corrigé et est conforme au fac-similé.
