mes, et tous les estrangers, comme i’en receus les nouuelles à Archangel : ceux qui eschapperent se retirerent à Poutimel qui est vne des villes capitales dudit Siuersqui : mesmes on disoit que ladite ville s’estoit renduë, et que toutes ces reuoltes estoient aduenuës par quelques troupes de Polonnois ramassez sur les confins de la Russie, et de Podolie, lesquels faisoient courir le bruict Demetrius estre en vie en Pologne, qui est tout ce qui s’est passé pour verifier le soupçon que l’on auoit de la vie de Demetrius, iusques au quatorziesme Septembre mil six cens six.
Quant aux opinions de ceux qui ne tiennent Demetrius Iohannes estre ou auoir esté fils de Iohannes Basilius surnommé le Tiran, ains vn imposteur, i’y repondray disant ce qui m’en semble.
L’obiection des Russes est premierement de Boris Federuits lors regnant, Prince fort subtil et cault, et d’autres ses ennemys. Qu’il estoit vn imposteur, veu que le vray Demetrius Iohannes fut tué en l’aage de sept à huict ans, à Ouglits, y a quelque dix-sept ans, comme auons touché cy-dessus. Ains qu’il estoit vn Rostrigue, à sçauoir vn Moine qui a quitté son Conuent nommé Grisque, ou Gregorij Otrepiof.
Et ceux qui s’estiment les plus clairs voyans, tant estrangers qui l’ont cognu, qu’autres, alleguent qu’il n’estoit pas Russe, ains Polonois, Transiluain, ou d’autre nation, esleué et nourry à cet effect.
Pour responce, i’ay touché cy-deuant le subiect pourquoy Boris Federuits, protecteur de l’Em-