luy, et que ceux qui se trouueroient coulpables fussent punis : auant cecy auoit esté faict commandement à la commune de s’en retourner chacun chez soy, et furent apprehendez cinq hommes qui estoient autheurs de cette conuocation de peuple : l’on tient que si ledit Choutsqui fust sorty, ou que la commune eust esté toute assemblée, il eust couru mesme risque que Demetrius : quelques iours apres lesdits cinq hommes furent condamnez à auoir le foüet par la ville, qui est le punissement ordinaire, et apres exilez : la sentence fut prononcée, faisant mention que Mistisloftsqui, lequel estoit accusé comme chef de cette menée, estoit innocent ; la coulpe tombant sur Pieter Sheremetof cy-dessus nommé.
Ledit Vacilei Choutsqui courut vn autre danger lors que l’on amena le corps du vray Demetrius (comme il en fait courir le bruict) meurtry dix-sept ans y a, ainsi que i’ay touché cy-deuant, en Mosco, où ledit Choutsqui auec le Patriarche et tout le Clergé l’allerent receuoir hors de la ville, ledit Choutsqui y faillit, comme l’on dit, à estre lapidé, combien que les nobles appaiserent la commune auant qu’ils fussent assemblez.
Pendant ce temps se reuolta le Duché de Siuersqui, qui auoit, selon le dire des Russes, ia presté le serment de fidelité au dit Choutsqui, et mirent sept ou huict mille hommes en campagne, soustenans Demetrius estre en vie, lesquels n’ayans nuls chefs, furent desfaits par les forces que Vacilei Choutsqui y enuoya, composées de cinquante à soixante mil hom-